Þetta er búinn að vera alveg ljómandi dagur í dag. Ég vaknaði tiltölulega snemma og eftir smá skrens á internetinu rölti ég yfir á Kjarvalsstaði til að kjósa. Aldrei þessu vant var ég ekki í neinum vafa um það hvað ég ætlaði að kjósa og að sjálfsögðu var það Borgarahreyfingin sem merkt var við, X við O.

Eftir að hafa kosið fór ég ásamt félaga mínum yfir í Skeifu í fæðuleit og vel mettir kíktum við síðan aðeins í kaffi til Helgu vinkonu okkar á kosningaskrifstofu Frjálslyndaflokksins.

Þegar þessari kurteisisheimsókn til andstæðingsins var lokið drifum við okkur niður á Laugaveg á kosningaskrifstofu Borgarahreyfingarinnar. Þar var heldur betur líf og fjör, troðið út að dyrum og allir í glimrandi fínu stuði. Ég þvældist þarna aðeins fyrir fólkinu og tók myndir í gríð og erg.

En að lokum fór svo að góða veðrið náði tökum á mig og ég bara varð að fara heim og sækja hjólið. Í svona veðri eins og er búið er að vera í dag verður maður hreinlega að taka hringinn og kíkja niður á torg og heilsa þar upp á liðið.

Nú er svo bara kosningavakan eftir og vonandi verður útkoman úr kjörkössunum í samræmi við, og helst betri, en skoðanakannanir hafa verið að sýna. Kannski að maður endi bara á því að skála í XO fyrir X-O.

… eða hvers vegna ég á að kjósa Borgarahreyfinguna

Ég rakst á þetta vídeó þegar að ég var að skoða b2. Eftir að hafa horft í smá stund var ég orðinn það heillaður að ég varð að leyfa fleirum að njóta þess.

Læt nokkur vídeó í viðbót fylgja með. Annars er hægt að skoða meira á youtube síðunni hans.

Jæja, þetta er loksins að hafast. Það stefnir allt í það að listarnir verði samþykktir í öllum kjördæmum þannig að Borgarahreyfingin verður valkostur fyrir kjósendur.

Að því tilefni koma hér nokkrar orðsendingar frá Borgarahreyfingunni.

Setjum X við O.

Það lýtur út fyrir að sjálfstæðismönnum verði að ósk sinni og stjórnlagafrumvarpið verði að engu á yfirstandandi þingi. Það gerir það að verkum að breytingar á stjórnarskránni verða ekki að veruleika á næstu misserum því næsta þing þarf að samþykkja breytingarnar líka til að þær nái fram að ganga.

Mikil er hræðsla sjálfstæðismanna við að tryggja að náttúruauðlindir séu í eigu almennings því þá geta þeir ekki grætt á þeim. Það er því synd að segja að þeir hafi lært eitthvað af skipbroti græðgisvæðingarinnar sem að viðgekkst undir þeirra stjórn og vilja þeir halda sukkinu áfram.

Einnig finnst þeim alveg skelfilegt að þessi sami almenningur og má ekki eiga auðlindirnar fái að breyta stjórnarskránni. Frekar vilja þeir að alþingi breyti henni en við vitum nú hversu vel alþingi hefur gengið að breyta stjórnarskránni enda er hún búin að vera nánast óbreytt frá upphafi. Stjórnlagaþing er algjört eitur í þeirra augum því þá gæti almenningur allt i einu tryggt að auðlindirnar séu ekki á höndum fárra útvaldra eins og sjálfstæðismenn vilja.

Oftar en ekki horfa sjálfstæðismenn til mekka frjálshyggjunnar, Bandaríkjanna, í hinum ýmsu málum og stundum finnst manni eins og allt þaðan sé gott. En hvernig stendur á því að sjálfstæðismenn snúa sér ekki til Mekka í tengslum við stjórnlagaþing? Samkvæmt mjög góðri bloggfærslu Völu Andrésdóttur Withrow þá var einmitt stjórnarskrá Bandaríkjanna skrifuð á einskonar stjórnlagaþingi. Í bæklingi sem skrifaður var í Pensylvaníu árið 1776 er tekið sérstaklega fram að löggjafarvaldið eigi ekki að geta breytt stjórnarskránni heldur skuli efnt til stjórnlagaþings til þess.

Augljóst er af þessu að Bandaríkjamenn voru strax árið 1776 mun framsýnni heldur en sjálfstæðismenn eru í dag.

Að lokum minni ég á það að Borgarahreyfingin er með það á stefnuskrá sinni að þjóðin semji sína eigin stjórnarskrá.