http://silfuregils.eyjan.is/2010/01/15/haiti-dagur-thrju-eftir-skjalfta/#comments

Laun forstjóra gömlu bankanna voru samkeppnishæf enda báru þeir svo mikla ábyrgð. Við vitum öll hvernig fór fyrir gömlu bönkunum þrátt fyrir samkeppnishæfa forstjóra og mikla ábyrgð.

Maður getur því ekki annað en velt því fyrir sér hvort að það sé hreinlega ekki betra að kjararáð ákvarði laun forstjóra ríkisbankanna og launin takmarkist þá við laun forsætisráðherra. Þannig væri kannski möguleiki á að fá hæfan forstjóra í staðin fyrir samkeppnishæfan.

Málið er nefninlega, eins og það lýtur út fyrir mér, að samkeppnishæfu starfsmennirnir hugsi fyrst og fremst um launin, bónusa og annað sem að snýr að þeirra eigin rassgati á meðan að hæfur starfsmaður hugsi kannski um hag bankans og jafnvel þjóðarinnar allar.

En þetta er kannski wishful thinking svo maður noti nú aðeins tungumál þjóðarinnar illu.

Aftur og aftur koma fréttir frá evrópu að hinir og þessir flokkar séu á móti inngöngu Íslands í ESB ef ekki verður gengið frá Iceslave samningunum. Á sama tíma koma stöðugar fréttir um það hvað Iceslave samningurinn sé slæmur fyrir þjóðina og að ESB og AGS hafi verið með puttana í málunum þegar að samningurinn var gerður.

Í síðustu viku var samþykkt að fara í aðildarviðræður við ESB (sælla minninga fyrir okkur í Borgarahreyfingunni, eða þannig) en enn á eftir að samþykkja Iceslave. Hvernig væri því að taka smá áhættu. Gambla aðeins. Fella Iceslave og láta svo á það reyna hvort að þeir sem að hafa verið með “hótanir” um að neita Íslandi inngöngu í ESB standi við stóru orðin.

Oft hefur því verið haldið fram að ESB vilji fá Ísland inn í sambandið til að komast yfir auðlindirnar okkar eins og t.d. fiskinn, raforkuna og svo hugsanlega olíu sem að gæti verið í landgrunninu. Ef þetta er raunin þá láta menn varla verða af hótunum um að koma í veg fyrir inngöngu Íslands.

Ef við fellum Iceslave og það verður samt farið á fullt við að semja við okkur, erum við þá ekki komin í betri samningsstöðu þar sem að við vitum hvers vegna ESB vill fá okkur inn?

Bara smá pæling.

Nú er ég ekki sáttur við þingmennina mína, þau Þór Saari, Margréti Tryggvadóttur og Birgittu Jónsdóttur.

Eftir hrunið í vetur tók ég þátt í mótmælunum af miklum móð, var á kafi í skipulagningu Opnu borgarafundanna og endaði svo á því að koma að stofnun Borgarahreyfingarinnar ásamt því að vinna baki brotnu að því að koma þessum einstaklingum á þing. Allt þetta gerði ég í þeim tilgangi að reyna að breyta samfélaginu og því hvernig alþingi, æðsta valdastofnun okkar, starfar. Ég var búinn að fá upp í kok af flokksræðinu sem þar ríkir og endalausum hrossakaupum þar sem að stuðningur við ákveðin, misgáfuleg, mál var falur fyrir rétt verð.

En nú hafa þessir þrír þingmenn Borgarahreyfingarinnar gert nákvæmlega þetta. Þeir vilja ekki styðja frumvarp nema að annað frumvarp verði fellt í staðin. Þetta eru ekkert annað en hrossakaup á borð við þau sem að við vildum berjast gegn. Og það get ég ekki samþykkt. Ég tók ekki þátt í þessu í vetur og vor til þess eins að verða eins og allir hinir. Ég hélt í einlægni minni að það væri hægt að breyta einhverju. En eina sem virðist breytast eru þeir sem að ætluðu að fara á undan með góðu fordæmi.

Stjórn Borgarahreyfingarinnar deilir sem betur fer ekki þessari skoðun með þingmönnunum og  gengur formaðurinn það langt að segja að þingmennirnir séu að bregðast trausti kjósenda sinna. Þessu er ég sammála því Borgarahreyfingin var, meðal annars, kosin út á það að ætla ekki að stunda svona pólitíska refskák eins og hinir flokkarnir. Því miður virðast þingmennirnir ætla að bregðast okkur að því leitinu og segi ég því við þau, eins og Þór sagði sjálfur fyrir ekki svo margt löngu, skammist þið ykkar.

Þessi frétt mbl.is er mjög mikil hraðsuða á ályktun umferðarráðs frá 14. maí. Stórum köflum er sleppt úr sem gerir það að verkum að fréttin er nánast algjörlega samhengislaus. Furðulegt þykir mér, í ljósi þess að það kemur nákvæmlega ekkert frá blaðamanninum heldur er þetta alfarið klippt úr ályktuninni, að ályktunin skuli ekki vera þarna í heild sinni.

Til að hjálpa mbl.is aðeins þá ætla ég að birta ályktunina í heild sinni. Hana er einnig að finna á heimasíðu Sniglanna, www.sniglar.is

Álykanir 227. fundar Umferðarráðs 14. maí 2009

Vegna breyttra aðstæðna í efnahagsmálum hér á landi má búast við að fólk ferðist meira innanlands en utan á komandi sumri. Fyrir bragðið má búast við aukinni bílaumferð sem hefur mögulega hættu í för með sér. Á tveimur undanförnum árum hefur átt sér stað jákvæð þróun varðandi fækkun banaslysa í umferðinni, en aldrei hafa þau orðið færri tvö ár í röð á síðustu 40 árum. Fjöldi látinna í umferð á hverja 100.000 íbúa á þessu tímabili er hvergi lægri í Evrópu en á Íslandi. Vonandi tekst að halda áfram á sömu braut á þessu ári með aukinni vitund fólks um mikilvægi ýmissa öryggisþátta í akstri. Engu að síður hefur alvarlega slösuðum fjölgað síðustu árin. Helstu ástæður eru of mikill umferðarhraði, ölvunarakstur og vanræksla á notkun bílbelta. Til þess að sporna við þeirri þróun varar Umferðarráð við niðurskurði fjármagns til Umferðarstofu en afleiðingin af því er m.a. skert umferðarfræðsla til barna og umferðaráróður í fjölmiðlum. Þá hvetur Umferðarráð stjórnvöld til þess að auka umferðarlöggæslu á vegum landsins í sumar vegna aukinnar umferðar. Einnig hvetur Umferðarráð alla þá sem leið eiga um vegi landsins að leggja sitt að mörkum svo takast megi að fækka alvarlegum umferðarslysum.

Bifhjólum í umferð hér á landi hefur fjölgað gífurlega á undanförnum árum. Í árslok árið 2000 voru 2.278 bifhjól skráð hér á landi, en í lok síðasta árs voru þau 9.009. Alvarlega slösuðum bifhjólamönnum hefur einnig fjölgað mikið á sama tímabili. Því er það sameiginlegt viðfangsefni bifhjólamanna og ökumanna bifreiða að gefa auknu umferðaröryggi gaum. Báðir aðilar þurfa að hafa sívakandi athygli og sjái bílstjóri bifhjól þarf hann alltaf að vera sérstaklega vel á verði. Hann þarf alltaf að líta tvisvar til hliðar og fylgjast nákvæmlega með hreyfingum bifhjólsins. Á sama hátt er grundvallaratriði að ökumenn bifhjóla aki á löglegan hátt, séu í hlífðarfatnaði og fylgi hámarkshraðareglum. Með því gera þeir sitt til að auka öryggi í umferðinni.Umferðarráð vill minna á sívaxandi hóp fólks sem notar reiðhjól sem samgöngutæki og hjólar eftir götum eins og lög segja til um. Nú eru yfir 7000 þáttakendur í keppninni “Hjólað í vinnuna”. Ökumenn bifreiða eru hvattir til að virða rétt þeirra og sýna tillitssemi. Reiðhjól eru ökutæki í umferðinni sem fara oftast hægar en bifreiðar. Ökumenn bifreiða þurfa að gefa reiðhjólafólki nægjanlegt rými þegar þeir taka framúr. Þar sem aðstæður á götum eru þröngar eiga bílstjórar að bíða með framúrakstur þar til það er öruggt. Hjólreiðamönnum ber að sýna annarri umferð fulla tillitssemi og hleypa hraðskreiðari umferð framúr, þegar það er óhætt. Ennfremur að virða forgangsrétt gangandi vegfarenda á gangstéttum og blönduðum útivistarstígum.

Þetta er búinn að vera alveg ljómandi dagur í dag. Ég vaknaði tiltölulega snemma og eftir smá skrens á internetinu rölti ég yfir á Kjarvalsstaði til að kjósa. Aldrei þessu vant var ég ekki í neinum vafa um það hvað ég ætlaði að kjósa og að sjálfsögðu var það Borgarahreyfingin sem merkt var við, X við O.

Eftir að hafa kosið fór ég ásamt félaga mínum yfir í Skeifu í fæðuleit og vel mettir kíktum við síðan aðeins í kaffi til Helgu vinkonu okkar á kosningaskrifstofu Frjálslyndaflokksins.

Þegar þessari kurteisisheimsókn til andstæðingsins var lokið drifum við okkur niður á Laugaveg á kosningaskrifstofu Borgarahreyfingarinnar. Þar var heldur betur líf og fjör, troðið út að dyrum og allir í glimrandi fínu stuði. Ég þvældist þarna aðeins fyrir fólkinu og tók myndir í gríð og erg.

En að lokum fór svo að góða veðrið náði tökum á mig og ég bara varð að fara heim og sækja hjólið. Í svona veðri eins og er búið er að vera í dag verður maður hreinlega að taka hringinn og kíkja niður á torg og heilsa þar upp á liðið.

Nú er svo bara kosningavakan eftir og vonandi verður útkoman úr kjörkössunum í samræmi við, og helst betri, en skoðanakannanir hafa verið að sýna. Kannski að maður endi bara á því að skála í XO fyrir X-O.

… eða hvers vegna ég á að kjósa Borgarahreyfinguna